گمبٽ(ن س) ضلعي خيرپور جي شهر گمبٽ جي ويجهو هڪ ڪار ۽ مسافر ڪوچ جي وچ ۾ ٽڪر جي نتيجي ۾ پيءُ ۽ سندس ٻه نياڻيون حياتيون وڃائي ويٺيون، جڏهن ته 4 ٻيا ماڻهو زخمي ٿي پيا. گمبٽ جي اسٽيشن هائوس آفيسر (ايس ايڇ او) رفيق سومرو ميڊيا سان ڳالهائيندي فوتگين جي تصديق ڪئي. هن ٻڌايو ته لاش ۽ زخمين کي گمبٽ انسٽيٽيوٽ آف ميڊيڪل سائنسز (گمز) منتقل ڪيو ويو آهي. رفيق سومرو موجب فوت ٿيل ٽئي ماڻهو ٽويوٽا ڪرولا ۾ ڪراچي طرف وڃي رهيا هئا، جڏهن ته مسافر ڪوچ خيرپور طرف اچي رهي هئي. هن شڪ ظاهر ڪيو ته ڪار ڊرائيور يا ته اسٽيرنگ تي ضابطو وڃائي ويٺو يا گاڏي هلائيندي ننڊ اچي ويس ، جنهن سبب ڪار مخالف روڊ تي اچي ڪوچ سان ٽڪرائجي وئي. اڃا تائين واضح ناهي ته گاڏي ڪير هلائي رهيو هو. ايس ايڇ او موجب فوت ٿيندڙن جي سڃاڻپ خيبرپختونخوا جي علائقي وزيرستان جي رهواسي نياز محمد ۽ سندس ٻن نياڻين طور ٿي آهي.
