ڪراچي(ويب ڊيسڪ)هر سال، سڄي دنيا ۾ گنجي پن کان متاثر ٿيل ماڻهو علاج لاءِ اربين ڊالر خرچ ڪن ٿا، پر ڪو به علاج 100 سيڪڙو اثرائتو اڃا ثابت ناهي ٿيو. هاڻي، هڪ نئين دريافت سان گنج پن جو اثرائتو علاج ممڪن بڻائڻ جي اميد پيدا ٿي وئي آهي. هن دريافت مان توقع ڪئي پئي وڃي ته مردن ۾ عام الوپ پيسا نالي مرض جو مؤثر علاج ممڪن ٿي سگهندو. هن بيماري ۾ عام طور تي مٿي جي وچ واري حصي جا وار ڪرڻ لڳندا آهن، ۽ آهستي آهستي هي عمل سڄي مٿي تي پکڙجي ويندو آهي.
ماهرن جي نئين دريافت
آسٽريليا، سنگاپور، ۽ چين جي ماهرن معلوم ڪيو آهي ته وارن جي پاڙن ۾ H.F.S.C (هيئر فوليڪل اسٽيم سيلز) نالي سيلز، وارن جي ٻيهر واڌ ۽ مرمت لاءِ ضروري آهن. انهن لاءِ MCL-1 نالي هڪ طاقتور پروٽين جي ضرورت هوندي آهي. جيڪڏهن MCL-1 نه هجي ته اهي اسٽيم سيلز دٻاءُ هيٺ اچي وڃن ٿا ۽ آهستي آهستي مري وڃن ٿا، جنهن سبب گنج پن جو خطرو وڌي وڃي ٿو. تحقيق مطابق، جڏهن H.F.S.C کي وارن جي ڪرڻ يا پاڙن جي ڪمزور ٿيڻ سبب تناؤ پيش اچي ٿو ته سيلز آهستي آهستي مري وڃن ٿا، ۽ ان سان وارن ڪرڻ جو عمل تيز ٿي وڃي ٿو.
نئين تحقيق سان نئين اميد
ماهرن جو چوڻ آهي ته اڳ ۾ معلوم هو ته MCL-1، H.F.S.C کي ريگوليٽ ڪري ٿو ۽ وارن جي ٻيهر واڌ ۾ مدد ڏئي ٿو، پر اهو عمل ڪيئن ٿو ٿئي؟، اهو معمو هو. ماهرن ڪوئن تي تجربا ڪيا، جتي انهن جي چمڙي جي سيلز مان MCL-1 ختم ڪيو ويو. نتيجي ۾، پاڙون متاثر نه ٿيون، پر وار ڪرڻ جوعمل تيز ٿي ويو. بالغ ڪوئن ۾ MCL-1 کي ختم ڪرڻ سان H.F.S.C جلدي تباهه ٿيا، جنهن سبب نئين وارن جي واڌ جو عمل رڪجي ويو. پر جڏهن محققن MCL-1 کي ٻيهر متحرڪ ڪيو ته نوان وار نڪرڻ لڳا، پر ان سان P53 پروٽين به متحرڪ ٿي وئي، جنهن پاڙن تي ٻيهر دٻاءُ وجهي ڇڏيو.
مستقبل جي واٽ
ماهرن جو چوڻ آهي ته MCL-1 ۽ P53 پروٽين جي وچ ۾ تعلق وارن جي پاڙن جي بقا ۽ گنج پن جي روڪٿام ۾ اهم ڪردار ادا ڪري ٿو. هن تحقيق جا نتيجا جرنل نيچر ڪميونيڪيشنز ۾ شايع ٿيا، پر ماهرن جو چوڻ آهي ته وڌيڪ تحقيق جي ضرورت آهي ته جيئن وارن جي ڪرڻ جي روڪٿام ۽ الوپ پيسا جو اثرائتو علاج ممڪن بڻائي سگهجي.
