اسلام آباد (ڊيسڪ نيوز) بندرگاهن ۽ سامونڊي معاملن بابت سينيٽ جي اسٽينڊنگ ڪميٽيءَ کي ٻڌايو ويو آهي ته گوادر پورٽ کي واپاري راهداريءَ (ٽرانزٽ ٽريڊ) طور کوليو ويو آهي ۽ ان سلسلي ۾ پهريون جهاز ايندڙ هفتي بندرگاهه ۾ ايندو. انگريزي اخبار ”ڊان“ ان سلسلي ۾ خبر ڏني آهي ته سينيٽ اسٽينڊنگ ڪميٽيءَ کي پورٽس اينڊ شپنگ وزارت جي عملدارن پاران انهيءَ ٽرانزٽ ٽريڊ بابت تفصيلي آگاهي ڏني وئي آهي. وزارت جي آفيسرن بريفنگ ۾ چيو ته گوادر جو مقابلو سنگاپور ۽ دبئي بندرگاهن سان ئي رهندو پر ڪارگو ۾ دير ٿيڻ تي ڏنڊ نه وجهڻ ۽ 03 مهينن تائين اسٽوريج مفت ۾ ڏيڻ جهڙين سهوليتن جي ڪري گوادر ۾ ڪاروبار وڌندو. ڪميٽيءَ کي ٻڌايو ويو ته گوادر بندرگاهه ۾ مڇيءَ کي محفوظ رکڻ لاءِ ڪولڊ اسٽوريج جي سهوليت مهيا ڪئي ويندي ۽ ان سلسلي ۾ سرمائيڪاري ڪندڙ چيني ڪمپنين کان اضافي ٽيڪس نه ورتو ويندو. ان موقعي تي اسٽينڊنگ ڪميٽيءَ جي ذيلي ڪميٽيءَ جي چيئرمين خداءِ نور چيو ته ”وڏين ڪمپنين کي ان ڳالهه جو پابند ڪرڻ لاءِ ته اهي مقامي ماڻهن کي روزگار ڏين ان لاءِ سينيٽ ۾ هڪ قرارداد منظور ٿيڻ گھرجي“.
