اسلام آباد (بيورو رپورٽ)حڪومت ۽ پاڪستان تحريڪ انصاف وچ ۾ باضابطا ڳالهيون اڄ کان شروع ٿيڻ جو امڪان آهي.ذريعن موجب پي ٽي آءِ جي 5 رڪني ڪميٽي حڪومتي ڪميٽي سان ڳالهيون ڪندي، جنهن ۾ بيرسٽر گوهر، عمر ايوب، صاحبزاده حامد رضا، اسد قيصر ۽ علي محمد خان شامل آهن.حڪومتي ذريعن جو چوڻ آهي ته هنن مفاهمت جو ماحول پيدا ڪرڻ لاءِ پي ٽي آءِ جي ڳالهين جي آڇ قبول ڪئي آهي، سياست ۾ افراتفري نه پر ڳالهين جو رستو آهي.ذريعن دعويٰ ڪئي آهي ته پي ٽي آءِ ڳالهين جي اڳين مطالبن تان پوئتي هٽي وئي آهي، پي ٽي آءِ 9 مئي ۽ 26 نومبر تي جڊيشل ڪميشن جوڙڻ چاهي ٿي.ذريعن جو چوڻ آهي ته پي ٽي آءِ اڳواڻ اسد قيصر قومي اسيمبلي جي اسپيڪر اياز صادق سان رابطو ڪري ملڪي سياسي صورتحال تي خيالن جي ڏي وٺ ڪئي.پي ٽي آءِ ذريعن جو چوڻ آهي ته اسد قيصر ۽ سلمان اڪرم راجا ڪجهه دير کانپوءِ اياز صادق سان ملاقات ڪندا. شروعاتي ملاقات ۾ پي ٽي آءِ ۽ حڪومت وچ ۾ ڳالهين بابت خيالن جي ڏي وٺ جو امڪان آهي ۽ امڪان آهي ته پي ٽي آءِ طرفان مطالبا پيش ڪيا ويندا.ڳالهه ٻولهه ۾ تحريڪ انصاف جي اطلاعات سيڪريٽري شيخ وقاص اڪرم چيو ته غير رسمي ڳالهين جو مطلب اهو ناهي ته ڳالهيون شروع ٿي ويون آهن، حڪومت ۽ پي ٽي آءِ وچ ۾ باضابطا ڳالهيون شروع نه ٿيون آهن.
