واشنگٽن(ويب ڊيسڪ) آمريڪي صدر ڊونلڊ ٽرمپ پنهنجي قومي سلامتي واري مشير جان بولٽن تي طالبان سان ڳالهين جي معلومات لڪائڻ جو الزام هڻندي برطرف ڪري ڇڏيو آهي. جان بولٽن جو چوڻ آهي ته مونکي برطرف ناهي ڪيو ويو پر مون پاڻ استعيفيٰ ڏني آهي. صدر ٽرمپ ٽوئٽر تي سندس برطرفي جو اعلان ڪندي چيو ته مون ڪالهه رات هن کي چيم اوهان جون خدمتون وائيٽ هائوس کي نه گهرجن جنهن بعد اڄ صبح هن استعيفيٰ ڏني آهي. جان بولٽن هميشه کان تڪراري سفارتڪار رهيو آهي ۽ جارحاڻي سوچ وارو آهي. عراق خلاف جنگ ۾ به هن جو ڪردار هو. ايران ۽ وينزويلا سميت جتي به مسئلا آهن هو ڏنڊي استعمال ڪرڻ جو حامي آهي. ياد رهي ته وائيٽ هائوس جي ترجمان اعلان ڪيو ته پرڏيهي وزير مائيڪ پومپيو ۽ جان بولٽن دهشتگردي خلاف گڏيل پريس ڪانفرنس ڪرڻ وارا آهن، جنهن جي ڪجهه دير بعد جان بولٽن جي برطرفي جو اعلان سامهون آيو.
