واشنگٽن(ويب ڊيسڪ) آمريڪي عملدارن جي حوالي سان سي بي ايس نيوز ٻڌايو آهي ته سعودي عرب جي تيل تنصيبات تي حملو ايران مان ٿيو ۽ ان ۾ ڊرونز ۽ ڪروز ميزائيل استعمال ٿيا. جنهن جاءِ تان حملو ڪيو ويو اها ايران ۾ نار جي اترين پاسي واقع آهي. سي بي ايس موجب سعودي ايئر ڊفينس ان حملي کي ان ڪري ناڪام نه بڻائي سگهي ڇو ته سندن هٿيارن جو منهن يمن جي ڏاکڻي پاسي هو. ايران انهن حملن جو انڪار ڪندي چيو هو ته آمريڪا يا ڪنهن به جنگ مڙهي ته هو جنگ لاءِ تيار آهن. سعودي عرب جي بادشاهه سلمان پاران اڱاري تي ٿيل ڪابينا اجلاس بعد سڌي طرح ايران تي حملي جو الزام ناهي لڳايو ويو پر اهو چيو ويو آهي ته حملي ۾ ايراني هٿيار استعمال ٿيا آهن.
آمريڪا سڌي طرح پهرين ڏينهن کان ايران کي حملن جو ذميوار قرار ڏنو هو. جنهن تي چين ۽ روس چيو هو ته بنا ثبوت جي الزام لڳائڻ غير ذميوراي آهي ۽ ڌرين کي ڇڪتاڻ نه وڌائڻ گهرجي. روسي ترجمان ته اهو به چيو هو ته ڪنهن ٻاهرين خطي جي ملڪ کي ان ۾ ملوث ٿيڻ نه گهرجي. جنهن بعد ترڪي ۾ ٽه طرفي اجلاس بعد روسي صدر ولاديمر پيوٽن ۽ ايراني صدر حسن روحاني ۾ تفصيلي ملاقات به ٿي هئي.
آمريڪي صدر ٽرمپ چيو هو ته سعودي عرب جي تيل تنصيبات تي حملن سبب سڄي دنيا متاثر ٿي آهي ۽ هڪ ڌڪ ۾ عالمي منڊي ۾ تيل جي اگهن ۾ سومر تي 20 سيڪڙو واڌ ٿي وئي هئي، جيڪا 1991 جي نار واري جنگ بعد هڪ ڌڪ ۾ پهريون ڀيرو ايڏي وڏي واڌ هئي. سعودي عرب چيوآهي ته تيل جي فراهمي پوري دنيا ۾ متاثر ٿي آهي ان ڪري دنيا ان جي ناڪاري اثرن جو نوٽيس وٺي. صدر ٽرمپ چيو هو ته هو وڌيڪ ثبوت چاهن ٿا ته حملو ڪنهن ڪيو ۽ ساڳئي وقت هو پراميد آهن ته جنگ جو خطرو ٽاري سگهن. آمريڪا سومر تي حملن جون سيٽلائيٽ تصويرون به جاري ڪيون هيون.
صدر ٽرمپ چيو آهي ته سعودي عرب تي ٿيل حملي کان وڏو جواب ڏيڻ سميت ڪيترائي آپشن موجود آهن پر ڪو به قدم کڻڻ کان اڳ اتحادين کي اعتماد ۾ وٺڻ ضروري آهي. هوڏانهن نيٽو سربراهه سعودي عرب جي تيل تنصيبات تي حملن بعد پيدا ٿيل صورتحال تي سخت ڳڻتي ظاهر ڪئي آهي. سعودي حملي بعد وزيراعظم عمران خان ولي عهد کي فون ڪري حملن جي مذمت ڪئي ۽ سڀاڻي 19 تي سعودي عرب جي دوري جو اعلان به ڪيو آهي.
