واشنگٽن (ڊيسڪ نيوز) آمريڪا جي ڊيموڪريٽ پارٽيءَ طرفان صدر ڊونلڊ ٽرمپ خلاف مواخذي جي باضابطه ڪارروائي شروع ڪرڻ جو اعلان ڪيو ويو آهي. آمريڪي صدر تي الزام هنيو ويو آهي ته هن 2020 وارين صدارتي چونڊن دوران سندس مقبلي ۾ بيهندڙ امڪاني اميدوار جوبائيڊن خلاف جاچ شروع ڪرڻ متعلق يوڪريني حڪومت تي دٻاءُ وڌو. ڊيموڪريٽ پارٽيءَ سان واسطو رکندڙ اسپيڪر نينسي پلوسيءَ چيو آهي ته ”صدر جو جوابده هجڻ ضروري آهي. صدر جي قدمن سان هُن جي آئيني ذميوارين جي خلاف ورزي ٿي آهي ان ڪري ضروري آهي ته ان جو احتساب ڪيو وڃي“.
ٻئي طرف ڊونلڊ ٽرمپ هڪ بيان وسيلي ڊيموڪريٽس جي اهڙي ڪوشش کي ”ڪچرو“ قرار ڏنو ويو آهي. آمريڪي صدر ٽوئٽر تي لکيو آهي ته پرڏيهي معاملن واري وزير مائيڪ پومپيو يوڪرين جي حڪومت کان ان ٽيليفون ڪال جي ڪاپي جاري ڪرڻ جي اجازت حاصل ڪئي آهي جنهن ٽيليفون ڪال وسيلي مون يوڪرين جي صدر سان ڳالهه ٻولهه ڪئي. انهن کي خبر ناهي ته ان ۾ آخر ڪهڙي وڏي ڳالهه آهي“. آمريڪا جي ايوان نمائندگان ۾ ڊونلڊ ٽرمپ خلاف مواخذي جي ڪارروائيءَ جھي حق ۾ ڊيموڪريٽس جي انگ ۾ اضافو ڏٺو ويو آهي ۽ 235 مان 145 ميمبر مواخذي جي ڪارروائيءَ جي حق ۾ آهن.
