سنڌ ۾ ٽئين ڏينهن به ميٽرڪ جا پيپر جاري، ڪاپي مافيا سرگرم، انتظاميا ناڪام

ڪراچي (نمائندن وٽان) ڪراچي، سانگهڙ، دادو، شڪارپور، جيڪب آباد، ڪشمور، ڪنڌڪوٽ، حيدرآباد، سکر، ميرپور خاص ۽ لاڙڪاڻو سميت سڄي سنڌ ۾ ميٽرڪ جا امتحان جاري آهن ۽ هر شهر مان ڪاپي جون شڪايتون ملي رهيون آهن. مختلف بورڊز تحت ميٽرڪ جي سالياني امتحانن جي ٽئين ڏينهن قلم 144 لاڳو هجڻ باوجود مختلف شهرن ۾ ڪاپيءَ جي ڌُم متل آهي. امتحاني سينٽرز اندر توڙي ٻاهر شاگردن جا مٽ مائٽ ۽ خود استاد به ڪاپي ڪرائي رهيا آهن. جڏهن ته اڪثر شهرن مان پيپرآئوٽ ٿيڻ جا اطلاع ملي رهيا آهن. تعليم کاتي جون ٽيمون متحرڪ ۽ پوليس اهلڪار مقرر هجڻ باوجود ڪاپيءَ جو سلسلو رُڪجي نه سگهيو آهي. ميرپور ماٿيلو ۾ ڏهين درجي جو انگريزي وارو پرچو آئوٽ ٿي ويو. لاڙڪاڻو تعليمي بورڊ جي نااهليءَ سبب لاڙڪاڻي ۾ به ڏهين درجي جي اردو جو پرچو آئوٽ ٿي ويو. راڻيپور، ڊرگهه بالا، ڳڙهي ياسين، عادلپور، پنون عاقل سميت مختلف شهرن مان مليل اطلاعات موجب امتحاني مرڪزن ٻاهران ماڻهن جي پيهه آهي. واٽس ايپ ذريعي شاگردن کي جواب موڪليا وڃن پيا.