ڪراچي(اسٽاف رپورٽر)آرٽس ڪائونسل ڪراچي ۾ عالمي ثقافتي ميلو 38 ڏينهن جاري رهڻ بعد گذريل رات پنهنجي پڄاڻي تي پهتو. دنيا جي 40 ملڪن جي 450 کان وڌيڪ فنڪارن دنيا جي تهذيبن، ۽ ثقافتن کي ڳنڍيندڙ ، موسيقي، ناچ، ٿيٽر ۽ فائن آرٽ جا جوهر ڏيکاريندڙ عالمي ثقافتي ميلي جي آخري ڏينهن نوجوانن ۾ مقبوليت ماڻيندڙ شاعر طيب تحزيب حافي محبت، درد، اڪيلائي جي موضوعن تي مشتمل . نظمن جي هڪ سلسلي ۾ لاڳاپو ۽ هجر، ٻڌندڙن کي داد ڏيڻ تي مجبور ڪري ڇڏيو. ان کان پوءِ لوڪ ڳائڻي اختر چنال روايتي گيتن سان ماحول ۾ تازگي پيدا ڪئي ۽ مشهور گيت دانا پي دانا ڳايو، جڏهن ته مقامي ۽ عالمي فنڪارن کي شيلڊون ڏئي پيار ۽ تعريف جا گل نڇاور ڪيا ويا. ٻئي طرف نوجوانن ۾ مقبول گلوڪار عاصم اظهر جي دلڪش پرفارمنس تي مداح به پرجوش نظر آيا، جڏهن عاصم اظهر اسٽيج تي قدم رکيو ته ميگا ايونٽ جي ڄڻ رونق وڌي وئي. مزاح نگار ۽ مشهور ليکڪ انور مقصود، مختلف ملڪن جي قونصل جنرل، سي سي پي او جاويد عالم اوڍو، چيف سيڪريٽري سنڌ آصف حيدر شاهه سميت اهم شخصيتن جي شرڪت تقريب کي چار چنڊ لڳائي ڇڏيا. YMCA گرائونڊ ۾ حاضرين ۾ وڏو انگ نوجاون ڇوڪرين ۽ ڇوڪرن سرڪت ڪئي. کچا کچ ڀريل اسٽيڊيم ۾ ماڻهن قيمتي لمحن کي پنهنجي موبائيل تي محفوظ ڪري ورتو، عالمي ثقافتي ميلو شاندار آتشبازي سان ختم ٿيو ۽ منتظمين اميد ظاهر ڪئي ته ايندڙ سال ميلي ۾ 100 ملڪن جا فنڪار پنهنجي ثقافت جا رنگ وکيريندا. ياد رهي ته پاڪستان ۾ هي پهريون ڀيرو عالمي ثقافتي ميلو ٿيو آهي جنهن ۾ ايڏي وڏي تعداد ۾ دنيا جي ملڪن ۽ فنڪارن شرڪت ڪئي. 26 سيپٽمبر کان شروع ٿيل هي عالمي ميلو 30 آڪٽوبر تي ختم ٿيڻو هو پر عوام جي ڀرپور پذيرائي سبب 2 نومبر تي رات جو پڄاڻي تي پهتو.
