اسلام آباد(رپورٽ اياز مهر) پي ٽي آءِ جي جنرل سيڪريٽري شاهه محمود قريشي جي پارٽي ڇڏڻ ۽ في الحال گوشه نشيني اختيار ڪرڻ جو خبرون سوشل ميڊيا تي وائرل ٿي رهيون آهن. پي ٽي آءِ جي ڪنهن به اڳواڻ پاران ان خبر جي تصديق يا ترديد هي خبر فائيل ڪرڻ تائين سامهون ناهي آئي. ذريعن جو چوڻ آهي ته قريشي، پارٽي جي جيل کان ٻاهر موجود پي ٽي آءِ اڳواڻن جي رويي کان ڪافي مايوس ٿي ويو آهي. سندس گرفتاري کان وٺي هن مهل تائين نه ڪنهن ساڻس ملاقات جي ڪوشش ڪئي ڪنهن اڳواڻ سندس گرفتاري جي مذمت ئي ناهي ڪئي. ذريعن جو چوڻ آهي ته قريشي، عمران خان جي رويي مان به خوش ناهي ۽ هن به ميڊيا ٽاڪ ۾ ڪڏهن سندس قيد جو ذڪر ناهي ڪيو. خان به رڳو بشريٰ بي بي ۽ پنهنجي ڀيڻن لاءِ آواز اٿاريندو رهيو آهي. ذريعن جو چوڻ آهي ته جيل ۾ قريشي جي طبيعت خراب آهي ۽ صحت جا ساڻس ڪافي مسئلا آهن. سندس ويجهن حلقن جو چوڻ آهي ته جيل مان آزاد ٿيڻ فوري بعد هو چيڪ اپ لاءِ لنڊن روانو ٿي ويندو. ذريعن جو چوڻ آهي ته شاهه محمود قريشي جيان پرويز الاهي به پارٽي اڳواڻن جي رويي مان مايوس آهي ۽ قريشي بعد الاهي به پارٽي ڇڏڻ جو اعلان ڪري سگهي ٿو.
