اسلام آباد (بيورو رپورٽ)وفاقي گهرو وزير محسن نقوي جو چوڻ آهي ته چيني شهرين ۽ منصوبن جي حفاظت کي يقيني بڻائڻ اولين ترجيح آهي.گهرو وزير محسن نقوي چين جي سفير جيانگ زيڊونگ سان چيني سفارتخاني ۾ ملاقات ڪئي.اجلاس ۾ محسن نقوي ڪراچي ۾ گارڊ جي فائرنگ سبب 2 چيني شهرين جي زخمي ٿيڻ واري واقعي تي افسوس جو اظهار ڪيو.گهرو وزير محسن نقوي چيني سفير کي واقعي جي تفصيل ۽ جاچ ۾ اڳڀرائي کان آگاهه ڪيو.هن چيني سفير، حڪومت ۽ زخمي چيني شهرين جي خاندانن سان مڪمل يڪجهتي جو اظهار ڪيو.ان موقعي تي ڳالهائيندي محسن نقوي چيو ته اسان ترقي ۽ سلامتي کي ضم ڪرڻ جي چيني تصور سان مڪمل طور تي متفق آهيون.محسن نقوي جو چوڻ آهي ته سي پيڪ منصوبن جي سيڪيورٽي کي يقيني بڻائڻ لاءِ هر ممڪن قدم کنيا پيا وڃن، چيني شهرين لاءِ محفوظ ۽ پرامن ماحول کي يقيني بڻائڻ لاءِ حفاظتي قدمن کي وڌيڪ بهتر ۽ مضبوط ڪيو پيو وڃي.وفاقي وزير اهو به چيو ته واقعي ۾ ملوث ماڻهن کي انصاف جي ڪٽهڙي ۾ آندو ويندو.
