ڪراچي(اسٽاف رپورٽر)سنڌ فوڊ اٿارٽي سائينٽفڪ پينل قائم ڪرڻ جو فيصلو ڪيو آهي، آئل ۽ گيهه جي شعبي لاءِ 20 رڪني سائينٽفڪ پينل قائم ڪرڻ جو نوٽيفڪيشن جاري ڪيو ويو. سائينٽفڪ پينل ۾ پنجاب، خيبرپختونخوا ۽ بلوچستان فوڊ اٿارٽي جا نمائندا به شامل آهن. مختلف يونيورسٽين جي فوڊ سائنس ماهر ۽ بناسپتي مينوفيڪچررز ايسوسي ايشن جا نمائندا به پينل ۾ شامل هوندا. پينل خوراڪ جي معيار ۽ فني رخن بابت سنڌ فوڊ اٿارٽي کي سفارشون ڏيندو. ڊي جي سنڌ فوڊ اٿارٽي مزمل حسين هاليپوٽو جو چوڻ آهي ته پينل جديد جاچ جي روشني ۾ خوراڪ جي شين جو معيار طئي ڪندو، سائينٽفڪ پينل جي قدمن سان آئل ۽ گيهه جي صنعت ۾ وڌيڪ بهتري ايندي. ڊي جي سنڌ فوڊ اٿارٽي مزمل حسين هاليپوٽو چيو ته سائينٽفڪ پينل جي جوڙجڪ سان خوراڪ جي تحفظ ۽ معيار ۾ بهتري ايندي، پينل عوام کي محفوظ خوراڪ جي فراهمي ۾ اهم ڪردار ادا ڪندو، سنڌ فوڊ اٿارٽي عوامي صحت ۽ خوراڪ جي معيار ۾ ڪابه سوديبازي نه ڪندي.
