ڪراچي(اسٽاف رپورٽر)پاڪستاني آل رائونڊر عماد وسيم کانپوءِ فاسٽ بالر محمد عامر به انٽرنيشنل ڪرڪيٽ تان رٽائرمينٽ جو اعلان ڪري ڇڏيو.ٻنهي رانديگرن آخري ڀيرو پاڪستان لاءِ هن سال آمريڪا ۽ ويسٽ انڊيز ۾ ٿيندڙ آءِ سي ٽي ٽوئنٽي ورلڊ ڪپ ۾ کيڏيو هو.جون 2009 ۾ انٽرنيشنل ڊيبيو ڪرڻ کان پوءِ، 32 سالن جي محمد عامر پاڪستان لاءِ 36 ٽيسٽ، 61 ون ڊي ۽ 62 ٽي ٽوئنٽي کيڏيا.عامر ٽنهي فارميٽ ۾ 271 انٽرنيشنل وڪيٽون ورتيون ۽ 1179 رنسون ٺاهيون.فاسٽ بالر محمد عامر 2009 جي آءِ سي ٽي ٽوئنٽي ورلڊ ڪپ کٽيندڙ اسڪواڊ جو حصو هو.محمد عامر جو چوڻ آهي ته پاڪستان لاءِ ٽنهي فارميٽ ۾ کيڏڻ اعزاز جي ڳالهه آهي، مان سمجهان ٿو ته اهو سخت فيصلو آهي پر مان سمجهان ٿو ته ايندڙ نسلن لاءِ ذميواريون کڻڻ ۽ پاڪستان ڪرڪيٽ کي نئين بلندين تي وٺي وڃڻ جو وقت آهي. هن چيو ته مان پي سي بي جو شڪريو ادا ڪرڻ چاهيان ٿو ته انهن سالن ۾ هميشه گهربل سهڪار فراهم ڪيو ۽ مان ٽيم جي ڪارڪردگي کي ڏسڻ جو منتظر آهيان. هن جو اهو به چوڻ آهي ته مان پاڪستاني مداحن جو به شڪريو ادا ڪرڻ چاهيان ٿو جن هميشه منهنجي ڪيريئر ۾ منهنجو ساٿ ڏنو.
