اسلام آباد (بيورو رپورٽ)وزيراعظم شهباز شريف پرڏيهي وزير اسحاق ڊار جي سفارش تي 2 پرڏيهي سفيرن جي مقرري جي منظوري ڏني، جڏهن ته پرڏيهي آفيس جي ترجمان ممتاز زهرا بلوچ کي فرانس ۾ سفير مقرر ڪيو ويو.پرڏيهي آفيس جي ذريعن جو چوڻ آهي ته مرغوب سليم بٽ سوئٽزرلينڊ ۾ پاڪستان جو نئون سفير هوندو، مرغوب سليم بٽ هن وقت پرڏيهي وزارت ۾ ايس سي او جو ايڊيشنل سيڪريٽري آهي.ان کانسواءِ عامر شوڪت کي مصر ۾ سفير مقرر ڪرڻ جي منظوري ڏني وئي، عامر شوڪت هن وقت سوئٽزرلينڊ ۾ پاڪستان جو سفير طور خدمتون سرانجام ڏئي رهيو آهي.پرڏيهي آفيس گذريل مهيني وزيراعظم شهباز شريف کي مقرري جي سمري موڪلي هئي، فرانس به سفارتي سطح تي نئين سفير جي مقرري جي منظوري ڏني هئي.ممتاز زهرا بلوچ فرانس ۾ پاڪستان جي نئين سفير هوندي، ممتاز زهرا بلوچ هن وقت پرڏيهي آفيس جي ترجمان طور خدمتون سرانجام ڏئي رهي آهي.
