راولپنڊي (ويب ڊيسڪ) راولپنڊي جي اڊيالا جيل ۾ احتساب عدالت، پاڪستان تحريڪ انصاف جي باني عمران خان ۽ سندس گهرواري خلاف 190 ملين پائونڊ واري القادر ٽرسٽ ريفرنس جي ٻڌڻي مڪمل ڪري فيصلو محفوظ ڪري ڇڏيو آهي. احتساب عدالت جي جج ناصر جاويد رانا 190 ملين پائونڊ ريفرنس جو فيصلو 23 ڊسمبر تي ٻڌائڻ جو اعلان ڪيو آهي. اڄ ٻڌڻي دوران پي ٽي آءِ باني ۽ سندس گهرواري بشرا بي بي جي وڪيل سلمان صفدر پنهنجا دليل مڪمل ڪري ورتا جڏهن ته نيب جي وڪيل امجد پرويز به دليل مڪمل ڪيا. ان موقعي تي عمران خان عداالت ۾ موجود هو ۽ هن مختلف موقعن تي پنهنجي وڪيل جي مدد ڪندي اهم پوائنٽ کيس ٻڌايا. عدالت 190 ملين پائونڊ ڪيس ۾ ڌرين جا حتمي دليل مڪمل ٿيڻ بعد فيصلو محفوظ ڪري ورتو، ريفرنس جو ٽرائل هڪ سال ۾ مڪمل ٿيو آهي. نيب گذريل سال ڊسمبر ۾ هي ريفرنس داخل ڪيو هو جنهن ۾ باني ۽ سندس گهرواري بشرا بيبي، فرحت شهزادي، شهزاد اڪبر، ذلفي بخاري، ملڪ رياض، علي ملڪ رياض سميت 7 جوابدارن کي نامزد ڪيو ويو هو. نيب جو چوڻ آهي ته مني لانڊرنگ جي هڪ ڪيس م برطانوي حڪومت ملڪ رياض جي لنڊن واري پراپرٽي نيلام ڪري 190 ملين پائونڊ پاڪستان حڪومت کي ڏنا هئا، جيڪي تقريبن 50 ارب روپيا بڻجن ٿا، اها رقم رياست جي اڪائونٽ ۾ جمع ڪرائڻ بدران عمران خان ۽ سندس ساٿين بند لفافي ۾ هڪ سمري ڪابينا ۾ ڪنهن به ميمبر کي ڏيکارڻ بنا منظوري وٺي اها رقم ملڪ رياض تي سپريم ڪورٽ پران لاڳو ڪيل ڏنڊ واري رقم جي بدلي جمع ڪرائي هئي. جنهن جي بدلي خان ۽ سندس ساٿين اربين روپيا روڪ ۽ سوين ڪنال زمين بحريا ٽائون کان ورتي. جنهن تي صوفي تعليم لاءِ القادر ٽرسٽ طرفان يونيورسٽي قائم ڪئي وئي هئي.
