اسلام آباد (رپورٽ اياز مهر ) پاڪ فوج جي ترجمان ۽ آءِ ايس پي آر جي، ڊائريڪٽر جنرل، ليفٽيننٽ جنرل احمد شريف چيو آهي ته جعفر ايڪسپريس تي حملي ۾ فوتين جو انگ 26 ٿي ويو آهي جن ۾ 18 فوجي شامل آهن. اهڙو اظهار هن بلوچسستان جي وڏي وزير سرفراز بگٽي سان گڏ ڪيل پريس ڪانفرنس ۾ ڪيو ۽ چيو ته علائقي ۾ ڪليئرنس آپريشن جاري آهي. هن چيو ته فوتين جي انگ ۾ اضافي جي امڪان کي رد نٿو ڪري سگهجي، ريسڪيو ذريعي 354 مسافرن کي آزاد ڪرايو ويو جن مان 37 زخمي آهن. اڳ ۾ فوجي ترجمان مسافرن جو ڪل تعداد 440 ٻڌايو هو پر پريس ڪانفرنس ۾ سرفراز بگٽي چيو ته ريلوي رڪارڊ موجب 425 ٽڪيٽون جاري ڪيون ويون هيون. جڏهن کائنس پڇو ويو ته ڇا ڪجهه مسافر بي ايل جي قبضي ۾ آهن ته وڏي وزير چيو ته ٿي سگهي ٿو ته ڪجهه ڀٽڪيل مسافر هنن جي هٿ لڳا هجن. انتيليجنس جي ناڪامي بابت سوال تي هن چيو ته انٽيليجنس جي بنياد تي هزارين آپريشن ڪامياب ٿيا آهن، اسين ان جو تفصيل نٿا ٻڌائي سگهون، ان ڪري مان ان راءِ سان متفق نه آهيان. هن ٻڌايو ته 2024 دوران انٽيليجنس جي بنياد تي ننڍا وڏا 59775 آپريشن ڪيا جن ۾ 1250 دهشتگرد ماريا ويا ۽ 563 فوجي جوانن شهادت حاصل ڪئي. هلندڙ سال جي ابتدائي اڍائي مهينن ۾ 11654 آپريشن ڪري چڪا آهيون ۽ روزانو جي بنياد تي 180 آپريشن انٽيليجنس جي بنياد تي تعداد بڻجي ٿو. ڊي جي آءِ ايس پي آر چيو ته واقعي کانپوءِ ڀارتي ميڊيا پاڪستان خلاف بيانيو گهڙڻ جي ڪوشش ڪئي، ڀارت بلوچستان ۾ دهشتگردي جو مُک اسپانسر آهي. احمد شريف چيو ته ڀارتي ميڊيا هٿرادو ذهانت واري ٽيڪنالاجي ۽ دهشتگرد گروپن جي وڊيوز کي پاڪستان مخالف بيانئي طور استعمال ڪيو.هن ٻڌايو ته حملو هڪ ڏورانهين ۽ ڏکئي علائقي ۾ ڪيو ويو، جتي دهشتگردن پنهنجي پروپيگينڊا کي هٿي ڏيڻ لاءِ مصنوعي ذهانت تي ٻڌل جعلي وڊيوز ٺاهيون، جيڪي ڀارتي ميڊيا مختلف پراڻين وڊيوز سان گڏ هلائي، پاڪستان خلاف بيانيو گهڙڻ جي ڪوشش ڪئي.احمد شريف موجب، دهشتگرد افغانستان ۾ موجود پنهنجي هينڊلرن سان رابطي ۾ هئا ۽ انهن ۾ آپگهاتي بمبار پڻ شامل هئا. هن چيو ته دهشتگرد ۽ انهن ج سهولتڪارن کي پاڪستان ۾ ۽ ملڪ کان ٻاهر جتي به هوندا انهن کي منهن ڏينداسين. ڊي جي آءِ ايس پي آر ٻڌايو ته آپريشن دوران ڪو به جاني نقصان نه ٿيو، سيڪيورٽي فورسز پهريان انجڻ ۽ پوءِ هڪ هڪ ڪري سمورين بوگين کي ڪليئر ڪرايو.هن چيو ته فوج، ايئر فورس، فرنٽيئر ڪور ۽ ڪمانڊوز آپريشن ۾ حصو ورتو، آپريشن دوران ڪنهن به مسافر کي نقصان نه پهتو.ڊي جي آءِ ايس پي آر موجب، دهشتگردن کي افغانستان ۾ اسپيس ملي رهيو آهي، جتي کين تربيت ڏيڻ جا ثبوت موجود آهن.پريس ڪانفرنس دوران ڊي جي آءِ ايس پي آر چيو ته فورسز جي آپريشن دوران 33 دهشتگرد ماريا ويا، دهشتگردن جي فائرنگ سبب 25 شهري ۽ پاڪ فوج جا چار جوان شهيد ٿيا، 354 يرغمالي بازياب ڪرايا ويا، جڏهن ته 37 زخمين جو علاج جاري آهي. ڊي جي آءِ ايس پي آر موجب، ضرار ڪمپني جا ڪمانڊوز پهريان ٽرين جي انجڻ تائين پهتا، جتان هو اندر داخل ٿيا ۽ دهشتگردن کي انجام تائين پهچايو. هن ٻڌايو ته دهشتگردن عورتن ۽ ٻارن کي ريل ۾ ئي رکيو، جڏهن ته ٻين مسافرن کي ٻاهر وٺي ويا، سيڪيورٽي فورسز دهشتگردن کي سنائپرز ذريعي نشانو بڻايو. ان موقعي تي بلوچستان جي وڏي وزير سرفراز بگٽي جعفر ايڪسپريس تي حملي جي مذمت ڪندي چيو ته دهشتگردن بلوچن جي روايتن کي پائمال ڪيو آهي. سندن مقصد پاڪستان کي غير مستحڪم ڪرڻ آهي، پر پاڪ فوج جي وقت سر ڪارروائيءَ سان وڏي انساني الميي کي روڪيو ويو. هن وڌيڪ چيو ته دهشتگردن کي افغانستان مان مدد ملي رهي آهي ۽ وٽن جديد پرڏيهي هٿيار موجود هئا. جعفر ايڪسپريس تي حملو ڀارت جي دهشتگرد پاليسين جو حصو آهي، جنهن جو مقصد پاڪستان ۾ عدم استحڪام پيدا ڪرڻ آهي. ياد رهي ته 11 مارچ تي ڪوئيٽا کان پشاور ويندڙ جعفر ايڪسپريس تي بلوچستان جي علائقي بولان ۾ هٿياربند ماڻهن حملو ڪري مسافرن کي يرغمال بڻايو هو، جڏهن ته واقعي جي ذميواري پابندي مڙهيل تنظيم بي ايل اي قبول ڪئي هئي.
