ڪراچي(ويب ڊيسڪ)ڪين وليمسن جي ڊبل سينچري ۽ ايش سوڍي سان شاندار پارٽنرشپ سبب نيوزيلينڊ پهرين ٽيسٽ ميچ ۾ پاڪستان خلاف پهرين اننگز 612 رنسن تي 9 وڪيٽن جي نقصان تي ڊڪليئر ڪري ڇڏي ۽ 174 رنسن جي مجموعي برتري حاصل ڪري ورتي. ڪراچي ۾ کيڏيل سيريز جي پهرين ٽيسٽ جي چوٿين ڏينهن نيوزيلينڊ پنهنجي پهرين اننگز 6 وڪيٽن جي نقصان تي 440 رنسون ٺاهي ٻيهر شروع ڪئي، ڪين وليمسن 105 ۽ ايش سوڍي هڪ رنس تي ٻيهر بيٽنگ شروع ڪئي. ٻنهي رانديگرن ذميواراڻي راند جو مظاهرو ڪيو ۽ پاڪستاني بالرن جو ڀرپور امتحان ورتو. ٻنهي 159 رنز جي پارٽنرشپ ڪئي ته ڪيريئر جو وڏو اسڪور ڪندڙ سوڍي 65 رنسون ٺاهي ابرار جو شڪار بڻيو. ان کان اڳ سوڍي جي بيٽ جي مٿانهين حصي کي ڇهندي بال ڪيپر وٽ ويو پر ڪنهن اپيل ئي نه ڪئي هئي. نائين وڪيٽ به جلد پاڪستان کي ملي پر جيئن ئي وليمسن جي ڊبل سينچري مڪمل ٿي ته هنن اننگ ڊڪليئر ڪئي. ابرار احمد پنج وڪيٽون ورتيون. پاڪستان ٻئي اننگ شروع ڪئي ۽ ٻن وڪيٽن تي 77 رنز ٺاهيون. امام الحق 45 ۽ نعمان علي 4 رنز تي ڪيريز تي موجود آهن. سڀاڻي آخري ڏينهن آهي ۽ ميچ ڊرا ٿيڻ جو امڪان آهي.
